Tumsa Uummatotaa Bilisummaa fi Dimookiraasii, ka jedhamu gamtaan mormitootaa, guyyoota xiqqoo dura kora isaa 1ffaa magaalaa Asmaraa keessatti geggeeffachuudhaan qaama hoogganaa filachuu isaa fi haala Gaanfa Afrikaa – kessumaa – haala Itiyoophiyaa keessaa yeroo ammaa irratti bal’inaan mari’achuu isaa ibsa baasee jira.
Dhaabonni siyaasaa shanan Tumsa kana keessatti hammataman – Sochii Bilisummaa Uummata Beniishaangul, Sochii Bilisummaa Uummata Gaambeellaa, Adda Bilisummaa Biyyoolessaa Ogaaden, Adda Bilisummaa Oromoo fi Adda Bilisummaa Biyyoolessaa Sidaamaa ti.
Kora tumsichaa amma geggeeffame irratti hoogganoonni marroo ammaaf filataman – Adda Bilisummaa Oromoo irraa Obbo Daawud Ibsaa dura-taa’aa tumsichaa, Adda Bilisummaa Biyyoolessaa Ogaaden irraa – Admiiraal Mohaammed Osmaan, itti-aanaa dura-taa’aa tokkoffaa, Sochii Bilisummaa Uummata Gaambeellaa irraa – Obbo Okeelloo Okiidii, itti-aanaa dura-taa’aa lammaffaa, Sochii Bilisummaa Uummata Beniishaangul irraa – Obbo Abdul-waahid Mahaadii miseensa, Adda Bilisummaa Biyyoolessaa Sidaamaa irraa – Obbo Bittaanaa Anfetoo miseensa ta’auun filatamuun beekamee jira. Kana ilaalchisuun, Namoon – dura-taa’aa tumsichaa ta’uun ka filataman – Obbo Daawud Ibsaa, Asmaraa irraa telefoonaan haasofsiisee jira.
