Yeroo Israa’el godaantota Afrikaa gara biyyoota isaaniitti deebisuuf murtii ishee deebistee haaressite kanatti, lammiwwan Afrikaa Israa’el keessa jiraatan kuma afurtamaa ol tahan, egereen isaanii haala yaaddessaa keessa jira.
Dura, muummichi-ministaraa Israa’el – Benjaamin Netanyaahuu, biyyi isaanii dhimma kana keessa deebitee fooyyessuuf, Jaarmayaa baqattootaa ka Tokkummaa Mootummootaa yokaan UNHCR wajjiin walii-galtee irra gahuu ishee ka dubbatanii turan yoo tahu, akka walii-galtee sanaatti silaa baqattoonni Afrikaa kuma kudha-jaha tahan gara biyyoota Addunyaa gama Dhihaatti ergaman. Kanneen kuma digdama tahan immoo achuma Israa’el keessatti hafanii ehamni kennamaaf ture.
Walii-galteen yeroo xiqqoodhaaf godaantota gammachiise iyyuu, guyyaa lammataa immoo, walii-galtee kana diiguu isaanii beeksisan – Netanyaahuun.
Baqattoonni Israa’el keessaa kun irra-jireessi, kanneen waggoota kurna dabran keessa Ertiraa fi Sudaan irraa gara sanatti baqatani.
