WAASHINGITAN, DIISII —
Baatilee darban shan keessatti weerarrii vaayrasii koronaa dargaggootaa fi shamarran irratti dachaa sadiin dabaluu jaarmayaan fayyaa addunyaa gabaasee jira.
Kunis wal-irraa fageenya ta'u qabu eeguu dhaba irraa akka ta'e kan ibsamee yoo ta'u baatii Guraandhala darbee hanga baatii Adooleessa walakkaatti namoota dhukkuba Koviid-19 qabaman Miliyoona 6 keessaa harkii 15 umriin isaanii 15 hanga 24 gidduu akka ture ibsameera.
Lakkoobsii kun baatii Guraandhala dura harka 4.5 qofa ture. Daayreekteerrii jaarmayaa fayyaa addunyaa Dr.Tedroos Adhaanoom dargaggonnii vaayrasii koronaan qabamuu, du'uu akkasumas nama kan biraatti dabarsuu akka danda'an irra deebinee hubachiifna jedhan.