Kaleessa Mooyyalee bakka Arballee jedhamutti Eegdonni daangaa Itiyoophiyaa konkolaataa tokko irratti dhukaasa bananii daa’ima ganna 9 ajjeesuu fi nama tokko ka biraa madeessuu jiraattonni Mooyyalee dubbatanii jiran. Daa’imi ajjeefame maqaan isaa Badhaanaa Taganee ka jedhamu yoo tahu, har’a namni bahee akka awwaale abbaan isaa obbo Taganee Raggaasaa Raadiyoo Sagalee Ameerikaatti himanii jiran.
Baqattoota gargaaruutti ka jiran Miseensi Waldaa Barattoota Ijoollee Booranaa, Ka Keeniyaa -- Horaa Korophisoo, kaleessa daangaa Itiyoophiyaa keessa ka jirut Arballeetti daa’imni sun ajjeefamee, reeffi isaa gara Keeniyaatti dhufuu dubbata. Gama biraatiin immoo, jaarsoliin naannoo, baqattoota ajjeechaa baqatanii daangaa Keeniyaa keessa jiran akka gara qe’ee isaaniitt deebi’an gaafannaan “haga magaalattiitti nageenyi guutuun deebi’utti ofirra hin deebinu” jechuun didan jedhu. Gabaasaa guutuu dhaggeeffadhaa.
