“Gaazzexeessaa Siisaay Fidaa ajjeesuun namoota shakkaman keessaa tokkorratti tarkaanfiin fudhatame” jechuun beeksise, Poolisiin Godina Qellam Wallaggaa.
Itti Aanaan Nageenya Naannoo Mirkaneessuu Godinichaa ibsa kennaniin “ Namni kun kaleessa nama hojii daandiirratti bobba’e tokko yeroo rasaasaan rukkutuun madeessutti, qaamonni naga-eegumsaa mootummaatii qabame” jedhan.
Gama biraatiin, Amaanu’eel Wandimmuu qabamee osoo dhimmi isaa seeraan ilaalamuu qabuu, humnoota naga-eegumsaa mootummaatiin ajjeefamuun isaa gochaa sirrii miti” jechuun himatan, Abbaan isaa.
Itti gaafatamaan Waajjira Nageenyaafi Bulchiinsaa Godina Qellam Wallaggaa gama isaaniitiin, “Amaanu’eel osoo haleellaa raawwatee baqachuuf yaaluu ti kan ajjeefame malee Addababayii irratti hin ajjeefamne,” jechuun haalan.
Komishiniin Mirgoota Namoomaa Itoophiyaa, “Magaalaa Dambi Doolloo keessatti murtoo seeraa tokko malee ajjeefamuun Amaanu’eel Wandimmuu na yaaddeesse,” jechuun ibsa baasee jira.
