Haalli kutaalee Yukireen afur kan jalqaba bara kanaa Raashaan gara ofiitti dabalte jedhan akkaan rakkisaa ta’uu Pirezidaantiin Raashiyaa Vilaadmiir Puutiin Kibxata kaleessaa beeksisanii jiran.
Puutiin miseensota tajaajila nageenyaa Raashiyaa waliin haasawa taasisaniin, baha Yukireen naannoo Donetsk fi Luhansk, akkasumas kibba Kherson fi Zaporizhzhia ibsaniiru.
''Ummanni achi jiraatu, isin lammiilen Raashiyaa, isin irratti, eegumsa keessan irratti hirkatu,'' jedhan Puutiin.
Raashiyaan naannolee afran qaama himannaa Puutiin Adoolessa keessa ofitti makamuuf dhiheessan keessaa tokkollee guutummaatti to’attee hin beektu. Tarkaanfiin isaan fudhatan kun hawaasa addunyaa irraa fudhatama dhabe.
Puutiin Kibxata har’aa, dhaabbati nageenyaa olaanaa Raashiyaa FSB daangaa biyyattii fi biyyattii keessatti hordoffii akka cimsu gaafataniiru.
Yaadni isaanii kun kan dhaga’ame erga daawwannaa hin baratamne Minsk-tti geggeessanii guyyaa tokko booda.
Ajajaan gamtaa humna waraanaa Yukireen Serhiy Nayev, walgahiin Puutiin gita isaanii Beelaaruus waliin taasisan ''weerara dabalataa Yukireen irratti raawwatamuu fi humnoonni waraanaa Beelaaruus duula Yukireen irratti gaggeeffamu keessatti hirmaannaa bal'aa, keessumaa, akka yaada keenyaatti, kan lafoos geggeessuuf jedhu jennee amanna jedhan.
Puutiin ibsa gaazexeessitootaaf kennaniin, ''Raashiyaan eenyuunuu dhuunfachuuf fedhii hin qabdu,'' jedhan.