Bulchiinsa mootummaa naannoo Oromiyaa godiina Qellem Wallaggaa magaala Dambii Dolloo keessatti kamiisa kaleessaa Guraandhala 2 bara 2023 ganamaa jalqabee naannoo ganda 03 fi karaa magaalatti ittu seenan kan naannaa ganda 05 keessatti dhukaasa guddaa dhaga’uu isaanii jiraattonni oduu gabaasaa RSAf ibsanii jiru.
Walitti dhukaasii kunis humnoota nageenya kabajsiisan fi kan aangawoonni Shanee jedhanii waaman Waraana Bilisummaa Oromoo giddutti kan gaggeeffamee dha shakki jedhu qabu jiraattonni.
Dhukaasii kun eega qabanaa’ee booda hidhattonni mootummaa kokolaataan deemaa meeshaa sagalee guddisuun “ Warrii mana hidhaa keessaa baatan deebi’aa seenaa” jedhanii labsaa akka turan namnii dhaga’ee jedhe tokko ibsee jira.
As Yunaaytid Isteetis keessa kan jiran dubbii himaan WBO Obbo Odaa Tarbii, hidhattonni keenya magaalaa Dambii Dolloo keessaatti haleellaa gaggeessanii jiruu, hidhattoota mootummaas ajjeesaniiruu kaanis boji’aniiruu akkasumas kanneen hidhaa keessa turan akka miliiqan taasiisan jechuun RSAf ibsanii jiru.
Haleellaa gaggeeffame jedhame kana ilaalchisee aangawoota naannoo sanaas ta’e kan Oromiyaa irraa odeeffannoo dabalataa argachuuf carraaqqii RSA taasisee hin milkoofne.