Hariiroo Yuunaayiitid Isteetiis fi biyyoota Galoo galaanaa kan cimsu dippiloomatoonni ol aanoo Yuunayiitid Isteetis kan Ministira haajaa alaa Antoonii Biliinkeeniin durfamu Saa’ud Arabiyaa magaalaa Riyaaditti daawwannaa taasisaa jiru.
Ministirri Haajaa alaa Yuunaayitid Isteetsii Antoonii Biliinkeen Imala gara Saa’ud Arabiyaatti taasiniin Roobii Waxabajjii 7 gita isaanii Ministira Haajaa alaa Sa’uudii waliin magaalaa Riyaad keessatti wal ga’ii taasisniin dhimmoota garaa garaarratti kan marii’atan ta’uu fi addattimmoo Biyya Yemeenii keessatti nagaa waraa fiduu kan jedhurratti marii taasiisuu isaanii dubbii himaan ministira haajaa alaa Yunaayiitid Isteetis himaniiru.
Dubbii himaan ministira haajaa Alaa Yuunaayitid Isteetsi Maatiiwu Miiler akka ibsanitti hooggantoonni lamaan walitti dhufeenya mana maree wal gargaarsa Galoo galaanaa fi Yuunayiitid Isteetsiin allattis Sudaan keessatti waraanni akka dhaabbatuuf gaafataniiru jedhan. Antoonii Biliinkeen daawwannaa isaanii kanaan Roobii kaleessaa Ganama Mootii Saa’uud Arabiyaa Mohaammad Biin Saalmaan waliin wal arguun dhimmoota waloo biyyoota lamaanii irratti keesumaa dhimmoota Imaammata Iraan fi nageenya naannichaa , gatii boba’aa fi mirga namoomaa irratti dubbataniiru.
Gama biraatiin Antoonii Biliinkeen yaa’ii ministiroota haajaa alaa kan biyyoota Galoo galaaanaa waliin taasisan irratti Yuunaayiitid Isteetis naannoowwan Siriyaa fi Iraaq keessaa garee leellistoota Islaamummaa irraa bilisa ba’aniif gargaarsa doolara biiliiyoona 150 akka taasiftu himaniiru.
Garee ISIS balleessuuf biyyyoonni addunyaa 80 ol waliin akka hojjetan kan ibsan Biliinkeen gareen kun irra caalaan biyyoota Siiriyaa fi Iraaq maadheffate jedhanii biyyi isaanii baajata haaraa hanga doolaara miiliyoona 600 ramaduuf akka jirtus himaniiru.