Naannoo Oromiyaa Godina Shawaa Lixaa Aanaa Cobiitti, humnootni naga eegumsa mootummaa namoota nagaa hedduu ajjeesuu isaanii jiraattotaafi kanneen ijaan argineerra jedhan keessaa hagi tokko Sagalee Ameeerikaatti himan.
Addi Bilisummaa Oromoo (ABO) fi Kongirasiin Federaalistii Oromoo (KFO)n ibsa kaleessa baasaniin, Kamisa darbe Akka Lakkoofsa Itoophiyaatti Hagayya 4 bara 2015 akka lakkoobsa Itiyoophiyaatti aanaa Cobii jedhamu keessaa namootni nagaa 11 humnoota mootummaan ajjeesamuu beeksisanii, Oromiyaa bakkeewwan biroottillee ajjeechaafi sarbamni mirgoota namummaa garaa garaa namoota nagaarratti taasisamu itti fufeera jechuun ibsan.
Paartileen siyaasaa kunneen mariin nagaa mootummaafi Waraana Bilisummaa Oromoo jidduutti akka itti fufiifi sarbamni mirga namummaa raawwatamullee dhaabbachuu qaba jechuun hubachiisaniiru. Dhimma kanarratti anga'oota Godina Shawaa Lixaa, Naannoo Oromiyaafi Federaalaa irraa deebii argachuuf yaaliin taasisne ammaaf hin milkoofne. Komishiniin Mirgoota Namummaa Itoophiyaa gama isaan, ajjeechaa Cobiitti raawwatame ilaalchisee odeeffannoo sasaabaa jiraachuu beeksisuun akka qorannoon adeemsisamus beeksisee jira.