Gaanfa Afrikaatti ergamaan addaa kan Yunaayitid Isteetis, Maayik Hamer Hagayya 28 irraa eegalee hanga Fulbaana 8, bara 2023tti gara Naayiroobii fi Finfinneetti imaluudhaan aangawoota Itiyoophiyaa fi Keeniyaa, kan Gamtaa Afrikaa fi kan IGAD waliin dhimmoota misoomaa fi dhimmoota idiladdunyaa biroo irratti kan mari’atan tahuu, ibse dubbi-himaa Ministiriii Dantaa Alaa Yunaayitid Isteetis irraa bahe beeksisee jira.
Mr. Hamer, rakkoo hamaa yeroo ammaa Sudaan keessatti mul’atu, akkasumas haala itti hookkara dhaabsisuu, bulchiinsa dimookiraatawaa gad dhaabuu fi murtii haqaa fi itti-gaafatamummaa hojii irra oolchuu deggeruun danda’amu irratti kan mari’atan tahuus ibsi kun hubachiisee jira.
Itiyoophiyaa keessatti ammoo, haala itti waliigaltee lola dhaabinsaa mallatteessame hojii irra oolchuun itti fufu irratti fi uummata siiviliif eegumsi taasisamu irratti akkasumas haala itti walitti-bu’insawwan naannoolee Amaaraa fi Oromiyaa keessaa mariin furmaata argatan irratti ka dubbatan tahuu, ibsa dubbi-himaa Ministirii Dantaa Alaa Yunaayitid Isteetis irraa bahe kana keessatti himamee jira.