Naannoo Oromiyaa Godina Wallaggaa dhihaa, naalee Qondaalaa fi Begii keessatti humnoota mootummaa fi hidhattoota Waraana Bilisummaa Oromoo gidduutti yeroo wal-waraansi deemsisamu namoonni nagaan ajjeesamuu jiraattonni bakkawwan sanaa Sagalee Amerikaatti himanii jiru. Ajjeechaa kana kanneen raaw’atanis humnoota motummaa akka tahanitti dubbatan, jiraattonni.
Kana ilaalchisee qaamota mootummaa irraas tahe Waraana Bilisummaa Oromoo irraa har’aaf deebii argachuu hin dandeenye. Torban dabre keessa garuu, dubbi-himaan mootummaa naannoo Oromiyaa, Obbo Hayiluu Addunyaa himannaa wal-fakkaataaf deebii kennaniin, “kan gochaalee akkanaa raaw’atu humnoota mootummaa otuu hin taane, hidhattota. Waraanni Mootummaa hidhattoota “Shanee” fi seelii irratti tarkaanfii fudhataa jira.” Jedhanii jiran. Waraanni Bilisummaa Oromoos, ammaan dura, himannaa gama mootummaatii irratti dhihaatu kana decdeebisee “dhara” jechuun haalaa ture.