Naannoo Tigiraay magaalaa Maqaleetti guyyoota lamaaf mariin dhaabollii siyaasaa , hayyotaa fi dhaabbilee siivikii hirmaachise kan qopheessummaa bulchiinsa yeroo naannichaan haala bulchiinsa siyaasaa nannichaa irratti taasifameera. Itti aanaan pireezidaantii bulchiinsa yeroo naannoo Tigiraay Leteenaat Janeraal Tsaadiqaan Gebire Tinsaa’ee marii kanarratti rakkooleen naannoo Tigiraay keessa amma jiran dhaaba siyaasaa tokko qofaan kan furmaata argatan miti jedhaan. Itti dabaluunis rakkooleen nu quunnamaa jiran yeroodhaa yerootti wal xaxaa kan dhufanii fi humna qaama tokko ykn dhaaba siyaasaa tokkoon ol ta’aniiruus jedhanii akka uummataattis kanarratti marii’achuun nu barbaachisa jedhan.
Haala naannichi keessa jiru irratti qorannoo taasifame kan qindeessan Obbo Weldesillaasee Weldemikaa’eel naannicha keessatti hanna cimaa, Ajjeechaa, miidhaa korniyaa irratti hundaa’ee gaggeeffamu, Ukkamsaa , daddabrsa namootaa seeraan alaa , daldala meeshaalee waraanaa seeraan alaa , weerara lafaa fi aldbuuda seeraan alaa baasuun warra bal’inaan jiran jechuun qorannoon argachuu ifoomsaaniiru. Rakkoowwan kunneen babbal’achuu isaaniifimmoo bulchiinsi heera mootummaa kabajee hojjetu dhabamuu isaatiinis jedhan.
Marii kanarratti yaada kan kennan dubbii himaan dhaaba Adda bilisa baasaa uummata Tigiraay Obbo Amaanu’eel Aseffaa rakkoowwan kanneen baay’isaanii tarreessuun abdii kutannaa akka hin fidne sodaan qaba jedhaniiru jechuun Maqalee irraa Muluugeetaa Atsibahaatu gaabase.