Kibxata darbe jechuun Fulbaana 14 bara 2017 akka lakkoobsa Itiyoopiyaatti boordiin filannoo beekkannaa kan hin kenninee fi kan falmii kaasise gumii hoogganoota ABUT irratti kanneen hirmaatan hoogganoonni ABUT ibsa baasaniin, humnoonni nageena naannichaa bulchiisa yerootiin hoogganamuu hin qabu jechuu dhaan ibsa kaabinee kan bulchiinsichaa mormanii jiru.
Bulchiinsichi yeroo humnootii nageenya naannoo jechuun kan waamuu, hoogganoonni ABUT immoo raayyaa waraana tigraay jechuun ibsu. Bulchiinsi yeroo walii galtee Pritooriyaa akka raawwachiisuu fi hojii bulchiinsaa akka hojjetu malee akka mootummaa dhaabbataatti raayyaa waraanaa geggeessuu hin danda’u jedha ibsi ABUT sun.
Akkasumas akka ijaarsa yeroo ammaatti bulchiinsichi yeroo itti waamamni isaa mootummaa federaalaafi, kanaaf raayyaan waraanaa mootummaa federaalaan akka ajajamu kan taasisu haala balaa qabu uuma kan jedhe ibsichi, raayyaan kun akka seera hiikkachiisuu fi hawaasatti makamuu jirutti gara jireenya isaa duraatti akka deebi’u kan eegu malee poolisii ykn milishaa waan hin taaneef bulchiinsichaan hoogganamuu hin qabu jedhee jira.
Raayyaan waraanaa kun attamiin akka geggeessamu marii mara hirmaachisetu barbaacisa kan jedhu ibsi ABUT kun itti dabalees bulchiinsiha sirreessuuf ABUT tarkaanfii ni fudhata jedha. Gareen bulchiinsicha keessa jiru dantaa uummata Tigraay dabarsee kan kennu jechuun illee yakkee jira. akkasumas qabeenyaa uummataa fi mootummaa gargaaramuu dhaan hojii badii qindaa’e hojjetaa jira jechuu dhaan ibsichi tuqeera.
Gama biraatiin prezidaantiin bulchiinsa yeroo obbo Geetaachoo reddaa bulchiisaawwan magaalaalee fi kutaa magaalaaleef Fulbaana 14 bara 2017 akka lakkoobsa Itiyoopiyaatti xalayaa barreessaniin, gareen gumii seeraan alaa geggeesse maneen maree gargaaramuu dhaan hoogganoota naan mormu ittiin jedhe aangoo irraa buusee maqaa balleessaa jira jedhan.
Manneen maree kun kan mootummaa malee kan paartii ykn kan garee miti kan jedhan obbo Geetaachoon, seeraa fi akkaataa hojiin geggeessamuun ala sochiin ta’u fudhatama hin qabu dhaabachuu qaba jedhan. kun yoo hin ta’in garuu itti gaafatamummaa hojii irra oolchuuf bulchiinsi isaaniii ni hojjeta jechuun xalayaa barreessaniin yaadachiisaniiru. Dhimma kana ilaalchisee hoogganoota ABUT, waajjira kominikeeshinii naannoo, hoogganoota humnootii nageenyaa fi komiishina haaromsa federaalaa biraa deebii argachuuf yaaliin ta’e hin milkoofne jechuun Mulugeta Atsbeha Meqelee irraa gabaaseera.